„Ég býst ekki við öðru en að verða klár þegar deildin hefst,“ sagði Ólafur Gústafsson, handknattleiksmaður þegar handbolti.is náði tali af honum í dag. Ólafur hefur ekkert leikið með KA-liðinu í æfingaleikjum en hann gekk til liðs við KA í sumar eftir þriggja ára veru hjá KIF Kolding í Danmörku.
„Staðan er bara mjög góð hjá mér og formið gott. Ég fékk smátog í bakið á æfingu um daginn. Þar af leiðandi hef ég verið að koma mér inn í leikinn á aðeins rólegri nótum en ella. Þess vegna hef ég ekki tekið þátt í æfingaleikjum fram að þessu. Það er svo sem ekkert óeðlilegt að líkaminn bregðist eitthvað við því að maður er að mæta í handboltasal í fyrsta skipti frá því í byrjun mars,“ sagði Ólafur sem hefur ekki áhyggjur af stöðu mála. Hann hlakkar fyrst og fremst til að taka slaginn með KA-liðinu á keppnistímabilinu sem framundan er.
KA tekur á móti Fram í fyrstu umferð Olísdeildarinnar á föstudaginn eftir viku. Flautað verður til leiks klukkan 19.30.
