Norski markvörðurinn Torbjörn Bergerud er sagður verða næsti markvörður franska stórliðsins PSG. Í síðustu viku var greint frá því að hann ætli ekki að endurnýja samning sinn við Flensburg-Handewitt áður en núverandi samningur rennur út næsta sumar.
Vefsíðan handball-planet segist hafa heimildir fyrir því að Norðmaðurinn flytji frá Flensborg til Parísar næsta sumar. Bergerud sagði á dögunum að hann ætli að róa á önnur mið eftir núverandi keppnistímabil en hefur verið þögull um hvert hugur hans stefnir.
Bergerud, er 26 ára gamall og er einn fremsti handknattleiksmarkvörður heims. Honum skaut hressilega upp á stjörnuhimininn á HM 2017 þegar norska landsliðið komst alla leið í úrslitaleik mótsins.
Núverandi aðalmarkvörður PSG er Vincent Gerard. Samningur hans við félagið rennur út sumarið 2022. Gerard tók við sem aðalmarkvörður af goðsögninni Thierry Omeyer bæði hjá PSG og franska landsliðinu. Hann hefur hinsvegar þótt æði misjafn. Einnig er markvörðurinn Yann Genty á samningi hjá PSG. Genty kom til félagsins í sumar eftir sex ára dvöl hjá Chambéry.
