Karlotta Kjerúlf Óskarsdóttir hefur ákveðið að yfirgefa Val og ganga til liðs við Gróttu. Þessu til staðfestingar hefur hún skrifað undir tveggja ára samning við Handknattleiksdeild Gróttu. Karlotta er örvhent og getur bæði leikið sem skytta og hornamaður.
Á yfirstandandi tímabili var Karlotta lánuð í Selfoss um stundarsakir þar sem hún stóð sig vel. Í heildina skoraði hún 20 mörk í Olísdeildinni með Val og Selfoss en einnig lék hún 10 leiki með Val U í Grill 66-deildinni og skoraði 34 mörk. Karlotta átti sæti í liði Vals sem varð Íslandsmeistari á laugardaginn.
„Það er mikill fengur að fá Karlottu enda frábær leikmaður sem mun nýtast Gróttu mikið. Karlotta er toppkarakter sem smellpassar inn í ungt Gróttulið,“ segir í tilkynningu frá Gróttu.
Í tilkynningunni er ennfremur haft eftir Sigurjóni Friðbirni Björnssyni: „Við erum í skýjunum með komu Karlottu. Það verður gaman að vinna með henni enda leikmaður sem vill stíga næsta skref.“
