Fréttasíðan handball leaks, sem er að finna á Instagram og sérhæfir sig í að segja frá óstaðfestum fregnum af handknattleiksfólki eins og nafnið gefur e.t.v. til kynna, gerir því í skóna í dag að Ýmir Örn Gíslason landsliðsmaður og leikmaður Rhein-Neckar Löwen söðli um í sumar og gangi til liðs við Frisch Auf! Göppingen. Bæði lið leika í þýsku 1. deildinni.
Ýmir Örn gekk til liðs við Rhein-Neckar Löwen frá Val í febrúar 2020. Hann er í íslenska landsliðinu sem tekur þátt í Evrópumótinu í janúar.
Svo virðist sem fleiri breytingar verði á leikmannahópi Rhein-Neckar Löwen í sumar því einnig segir handball leaks frá því að Uwe Gensheimer leggi skóna á hilluna og taki starfi utan leikvallarins hjá félaginu sem hann hefur meira og minna leikið með allan sinn feril.
