Sandra Erlingsdóttir landsliðskona í handknattleik verður í eldlínunni í dag þegar lið hennar TuS Metzingen leikur til undanúrslita í þýsku bikarkeppninni. TuS Metzingen mætir meisturum Bietigheim sem ekki hefur tapað leik í deildinni og þaðan af síður í bikarkeppninni á keppnistímabilinu.
Leikið verður í glæsilegri keppnishöll, Porsche-Arena í Stuttgart. Viðureign Tus Metzingen og Bietigheim hefst klukkan 13.15.
Í hinni viðureign undanúrslita eigast við HSG Bensheim/Auerbach og Oldenburg. Sigurliðin leika til úrslita á morgun og tapliðin bítast um bronsið áður en að úrslitaleiknum kemur.
Kristbjörg bikarmeistari 1977
Eftir því sem næst verður komist er Kristbjörg Magnúsdóttir eina íslenska handknattleikskonan sem orðið hefur bikarmeistari í Þýskalandi. Hún vann bikarinn með TuS Eintracht Minden árið 1977. Kristbjörg varð þýskur meistari með TuS Eintracht Minden 1975 og aftur ári síðar.
