„Það hefur togað meira og meira í mig með hverju árinu eftir að dóttir mín fæddist að flytja heim til Íslands. Síðan fann ég það snemma í haust að ég var tilbúinn að stíga skrefið. Það væri mikilvægara fyrir mig og mína að ég væri á svæðinu,“ sagði Aron Pálmarsson fyrirliði íslenska landsliðsins í handknattleik á fundi með fjölmiðlum og stuðningsmönnum FH í Kaplakrika í kvöld þar sem hann skrifaði undir samning þess efnis að ganga til liðs við FH á næsta sumri.
FH eini kosturinn
Aron sagðist hafa haft frumkvæðið að því að hafa samband við FH um að koma heim og ganga til liðs við uppeldisfélagið sem hann lék síðast með vorið 2008. Hugur hans hafi ekki leitað annað eftir að ákvörðun var tekin um að flytja til Íslands. „Ég opnaði þar af leiðandi aldrei fyrir aðra kosti eða hafði samband við önnur félög,” sagði Aron og bætti við. „FH-hjartað kallaði á mig.“
Aron kom til landsins frá Danmörku síðdegis og fór nánast um leið í Kaplakrika þar sem fundurinn var haldinn í frábærri umgjörð. Meira að segja var splæst í reykvél. Skiljanlega var hátíðarstemning í fólki enda ekki á hverjum degi sem leyfilegt er að líta í stærsta jólapakkann tveimur sólarhringum fyrir aðfangadagskvöld.
Aron sagðist hafa haft frumkvæðið að því að hafa samband við FH um að ganga til liðsvið félagið. Ekkert annað lið hér heima hafi komið til greina.
Frumkvæðið var Arons
„Þegar ég hafði tekið þessa ákvörðun hafði ég samband við FH og hljólin fóru að snúast. Til að byrja með var um að ræða smá sjokk fyrir alla en eftir að menn tóku til við að vinna þá vorum við ekki lengi að komast að niðurstöðu og gengum frá samkomulagi fyrir nokkrum vikum sem var endanlega innsiglað hér í kvöld,“ sagði Aron ennfremur en gríðarlegur fjöldi fólks lagði leið sína í samkomusal FH á fundinn í kvöld og var Aron undir dynjandi lófaklappi frá fyrstu mínútu er hann steig inn í salinn.
Talaði bara við FH
„Það kom ekkert annað til greina en að fara í FH og því hafði ég aðeins samband við forráðamenn handknattleiksdeildar FH. Ég held að allir í handboltanum hér heima á Íslandi viti að ég færi aldrei að leika fyrir annað lið. Ég fór þar af leiðandi aldrei út í að opna fyrir aðra kosti eða hafa samband við önnur félög,“ sagði Aron Pálmarsson landsliðsmaður í handknattleik og verða liðsmaður FH haustið 2023.
