FH varð í dag annað liðið til þess að tryggja sér sæti í undanúrslitum Olísdeildar karla í handknattleik og fylgdi þar með í fótspor Vals sem vann sér sæti í undanúrslitum í gær.
FH vann KA örugglega í annarri viðureign liðanna í KA-heimilinu, 25:19. Deildarmeistararnir unnu fyrri leikinn, 30:28, á heimavelli sínum á fimmtudagskvöldið.
FH mætir annað hvort ÍBV eða Haukum í undanúrslitum. Sennilega verður fyrsti leikurinn 22. apríl í Kaplakrika.
Eftir sveiflur fram af fyrri hálfleik í troðfullu KA-heimili í dag var FH með sex marka forskot að loknum fyrri hálfleik, 16:10.
Varnarleikur Hafnarfjarðarliðsins var framúrskarandi og markvarslan aldeilis ágæt hjá Daníel Frey Andréssyni. Hann varði m.a. tvö vítaköst í fyrri hálfleik auk skota eftir hraðaupphlaup.
Deildarmeistararnir héldu í horfinu í síðari hálfleik. KA-liðið náði sér aldrei á flug, ekki síst í sókninni. Bruno Bernat markvörður fór hamförum í síðari hálfleik í marki KA. Það dugði skammt þegar margt annað fylgdi ekki með.
Jóhannes Berg Andrason var ekki í liði FH í dag.
Mörk KA: Magnús Dagur Jónatansson 6, Ólafur Gústafsson 4, Ott Varik 3, Einar Rafn Eiðsson 2, Jóhann Geir Sævarsson 2, Einar Birgir Stefánsson1, Dagur Árni Heimisson 1.
Varin skot: Bruno Bernat 15/2, 53,6% – Nicolai Horntvedt Kristensen 1, 10%.
Mörk FH: Aron Pálmarsson 8/2, Jón Bjarni Ólafsson 6, Birgir Már Birgisson 4, Leonharð Þorgeir Harðarson 3, Einar Bragi Aðalsteinsson 2, Jakob Martin Ásgeirsson 1, Einar Örn Sindrason 1.
Varin skot: Daníel Freyr Andrésson 14/3, 43,8%.
Tölfræði leiksins hjá HBStatz.
Sjá einnig:
Olís karla: Leikjadagskrá, úrslitakeppni
