Færeyski landsliðsmarkvörðurinn Nicholas Satchwell leikur ekki fleiri leiki með KA á þessu keppnistímabili. Hann fingurbrotnaði illa eftir sigur KA á Haukum á Ásvöllum á föstudagskvöld, eftir því sem heimildir handbolta.is herma. Hlaut hann opið fingurbrot og er þar af leiðandi í gipsi upp að olnboga. Eftir því sem næst verður komist brotnaði þumalfingur hægri handar.
Óhappið átti sér stað eftir leikinn þegar leikmenn KA voru að kætast yfir sætum sigri, 30:29, sem Óðinn Þór Ríkharðsson innsiglaði úr vítakasti þegar leiktíminn var úti. Satchwell mun hafa stokkið á einn samherja sinn í gleðinni með fyrrgreindum afleiðlingum og afar slysalegum.
KA mætir Haukum öðru sinni í átta liða úrslitum í KA-heimilinu annað kvöld. Bruno Bernat mun þá standa vaktina í KA-markinu eins og hann hefur svo oft gert áður í vetur með góðum árangri.
Stórdagur á morgun! Óskar skrifaði undir sinn fyrsta mfl samning í hádeginu í dag og verður í hóp á morgun gegn Haukum. #StolturBróðir 💛💙 https://t.co/sDZzLVylId
— Özzi🚬 (@ozzikongur) April 24, 2022
Óskar Þórarinsson, 16 ára markvörður úr 3. flokki og 4. flokki, verður á vaktinni með Bruno. Óskar skrifaði um helgina undir leikannasamning við KA svo hann verði gjaldgengur með meistaraflokki.
Viðureign KA og Hauka í átta liða úrslitum Olísdeildar karla hefst klukkan 18.30 á morgun í KA-heimilinu. Takist KA að vinna tekur liðið sæti í undanúrslitum en ef Haukum tekst að sigra í leiknum kemur til oddaleiks á Ásvöllum á miðvikudaginn.
