Finnur Hansson hefur verið ráðinn aðstoðarþjálfari færeyska kvennalandsliðsins í handknattleik. Tekur hann við starfinu af Julian Johansen. Finnur verður þar með samstarfsmaður Dragan Brljevic, landsliðsþjálfara sem tók við þjálfun færeyska kvennalandsliðsins á síðasta ári af Ágústi Þór Jóhannssyni.
Finnur er 41 árs gamall Hafnfirðingur sem hefur búið í Færeyjum í um tvo áratugi. Á þeim tíma hefur hann leikið með félögum á Eyjunum auk þess að þjálfa félagslið. Finnur er aðstoðarþjálfari Neistans í Þórshöfn og hefur unnið með Arnari Gunnarssyni aðalþjálfara liðsins síðasta árið og tók einnig þátt í einum og einum leik á leiktíðinni sem er nýlokið í Færeyjum.
Finnur er af mikilli handboltafjölskyldu. Faðir hans Hans Guðmundsson var lengi leikmaður FH og fleiri liða og landsliðsmaður. Afi Finns í móðurætt var Birgir Björnsson, landsliðsmaður í handknattleik, landsliðsþjálfari og félagsþjálfari og burðarás handknattleiksliðs FH um árabil. Finnur og Ágúst Elí Björgvinsson, landsliðsmarkvörður í handknattleik, eru systrasynir og svona væri lengi hægt að telja.
