Finnur Ingi Stefánsson, handknattleiksmaður hjá Val, hefur ákveðið að leggja skóna á hilluna eftir því sem fram kemur í tilkynningu frá Val. Finnur Ingi hefur undanfarin fjögur ár leikið með Val og var m.a. í stóru hlutverki í margföldu meistaraliði Vals 2021 og 2022 sem stóð í ströngu í Evrópudeild karla á síðasta vetri.
Finnur Ingi hefur glímt við þrálát meiðsli í hásinum síðustu mánuði og mun sú staðreynd m.a. hafa átt þátt í þeirri ákvörðun hans að rifa seglin. Finnur Ingi hvorki æfði né lék með Val á undirbúningstímabilinu í sumar.
Finnur Ingi er alinn upp í Gróttu en kom til Vals 2010 og spilaði fjögur tímabil þá með liði félagsins uns hann sneri aftur í herbúðir Gróttu. Eftir veru hjá Gróttu var Finnur Ingi með Aftureldingu í tvö ár áður en skipti aftur yfir til Vals á nýjan leik sumarið 2019. Finnur Ingi hefur einu sinni klæðst landsliðspeysunni. Titlarnir með Val eru átta.
