- Auglýsing -

Fjórir smitaðir – Evrópuleik frestað hjá Viktori Gísla

Viktor Gísli Hallgrímsson, markvörður íslenska landsliðsins og GOG í Danmörku. Mynd/EPA

Ekkert verður af því að Viktor Gísli Hallgrímsson og samherjar í danska liðinu GOG mæti Trimo Trebnje frá Slóveníu í Evrópudeildinni í handknattleik annað kvöld eftir að þjálfari GOG, Nicolej Krickau, og leikmaðurinn Emil Madsen greindust með kórónuveiruna í dag. Þar með eru fjórir innan hópsins hjá GOG með veiruna.

Markvörðurinn Sören Haagen og Kasper Kildelund greindust jákvæðir við skimun fyrir helgina. Þrátt fyrir það þá sótti GOG liðsmenn Lemvig heim í dönsku úrvalsdeildinni á laugardaginn. Haagen og Kildelund tóku vitanlega ekki þátt í leiknum.

Nú verður hinsvegar ekkert af ferð þeirra til Slóveníu en til stóð að þeir færu í dag. Samkvæmt reglum Handknattleikssambands Evrópu verða þjálfarar, leikmenn og starfsmenn liða að fara í kórónuveirupróf 48 tímum fyrir kappleik í Evrópkeppni félagsliða.

Ekki leikið við Frederica

Til greina kemur að viðureign GOG og Frederica í dönsku úrvalsdeildinni sem fram á að fara á laugardaginn verður frestað. Reyndar gera reglur í Danmörku ekki ráð fyrir að lið geti sótt um frestun nema að a.m.k. fimm innan hópsins séu kórónuveirusmitaðir. Forsvarsmaður Fredericia segir við TV2 að vel komi til greina að fresta leiknum þótt skilyrðum hafi ekki verið fullnægt.

- Auglýsing -
- Auglýsing -

Nýjustu fréttir

- Auglýsing -