Glatt var á hjalla í Thansen ARENA í Fredericia í dag þegar Fredericia Håndboldklub vann Aalborg Håndbold í fyrsta sinn í 20 ár í dönsku úrvalsdeildinni í handknattleik. Lokatölur voru 29:28. Guðmundur Þórður Guðmundsson er þjálfari Fredericia Håndboldklub og Einar Þorsteinn Ólafsson leikur með liðinu þótt hann hafi lítið komið við sögu.
Uppfært: Á það hefur verið bent að Einar Þorsteinn hafi hafi ekki verið minna en frábær í hjarta varnar Fredericia í leiknum.
Aron Pálmarsson skoraði fimm mörk fyrir Álaborgarliðið og gaf sjö stoðsendingar. Frakkinn James Scott skoraði 13 mörk fyrir Fredericia Håndboldklub sem er í 7. sæti deildarinnar með 24 stig eftir 22 leiki.
Hvorki Mikkel Hansen né Felix Claar léku með Aalborg í leiknum.
Fjórar umferðir eru óleiknar í dönsku úrvalsdeildinni og treysti sigurinn stöðu Fredericia Håndboldklub í keppninni um eitt af átta efstu sætunum sem tryggir þátttökurétt í úrslitakeppninni um danska meistaratitilinn.
GOG er komið upp að hlið Aalborg Håndbold. Hvort lið hefur 37 stig eftir 22 leiki. GOG, sem á titil að verja, vann Kolding á heimavelli í dag, 37:27. Kolding-liðinu hefur fatast flugið upp á síðkastið en er þó enn í fjórða sæti, stigi á undan Skjern.
Bjerringbro/Silkeborg er í þriðja sæti með 34 stig og sætir lagi ef efstu liðin tvö slá á feilnótu undir lokin.
