„Hjá mér er enginn ótti að fara þangað, ég kem þangað sem gestur og mun bera virðingu fyrir þeirra siðum og hefðum,“ segir Sveinbjörn Pétursson handknattleiksmarkvörður í samtali við Akureyri.net. Sveinbjörn samdi á dögunum við ísraelska handknattleiksliðið Hapoel Ashdod til eins árs. Hann verður fyrsti íslenski handknattleiksmaðurinn til þessa að leika með ísraelsku liði.
Sveinbjörn hefur samið við ísraelskt félagslið
„Fólk má hafa sitt álit á hverju sem er, það er eitthvað sem truflar mig ekkert. Ég er að fara þangað til að spila handbolta og upplifa nýjan heim með kærustunni minni og við erum bara spennt og glöð yfir því,“ segir Sveinbjörn ennfremur við hinn eina sanna vefmiðil Akureyri.net.
Borgin Ashdod er rúmlega 30 kílómetrum sunnan við Tel Aviv og aðeins tæpum 50 kílómetrum norðan Gaza strandarinnar, þar sem miklar hörmungar hafa átt sér stað síðustu mánuði.
„Það er nú bara eins og gengur og gerist í þessum handbolta. Það datt inná borð til umboðsmannsins míns að þetta lið væri að leita að markmanni og ég lét hann vita að ég væri forvitinn um þetta,“ segir Sveinbjörn sem er hvergi banginn, hvorki við ástandið í Ísrael né þá gagnrýni sem hann hugsanlega fær fyrir að semja við ísraelskt félagslið eins og málum er komið.
Nánar má lesa viðtal Akureyri.net við Sveinbjörn hér.
