Frændurnir mætast í undanúrslitum í Lanxess Arena

Sannkallaður Íslendingaslagur verður í undanúrslitum þýsku bikarkeppninnar þegar frændurnir frá Selfossi, Elvar Örn Jónsson og Teitur Örn Einarsson, mætast með liðum sínum, MT Melsungen og Flensburg Handewitt. Dregið var í hádeginu. Arnar Freyr Arnarsson leikur einnig með MT Melsungen.

Tvö efstu lið þýsku 1. deildarinnar í handknattleik, SC Magdeburg og Füchse Berlin, drógust saman í hinni viðureign undanúrslita. Íslendingatríóið Gísli Þorgeir Kristjánsson, Janus Daði Smárason og Ómar Ingi Magnússon leika með SC Magdeburg. Tveir þeirra eru einnig frá Selfossi.

Bikarkeppnin verður leidd til lykta með úrslitahelgi leikjum liðanna fjögurra í Lanxess Arena í Köln 13. og 14. apríl.