Tveir leikmenn Framliðsins í dag sem mætir KA/Þór í úrslitaleik Coca Cola-bikarsins í handknattleik kvenna, frænkurnar Karen Knútsdóttir og Stella Sigurðardóttir, voru í sigurliði Fram í bikarkeppninni árið 2010. Fram vann þá Val, 20:19, í æsispennandi úrslitaleik í Laugardalshöll.
Einar Jónsson sem þjálfar karlalið Fram, sem einnig leikur til úrslita síðar í dag, var þá þjálfari Fram. Þjálfari Vals í úrslitaleiknum 2010 var Stefán Arnarson, núverandi þjálfari Fram.
Árið eftir vann Fram aftur sigur á Val í úrslitaleik bikarkeppninnar, þá 25:22. Frænkurnar voru einnig á sínum stað í þeirri viðureign auk þess sem Stefán þáverandi þjálfari Vals mátti játa sig sigraðan.
Úrslitaleikur Fram og Íslandsmeistara KA/Þórs í Coca Cola-bikarnum 2021 hefst klukkan 13.30 og verður m.a. fylgst með honum í textalýsingu á handbolta.is.
