Fram varð fyrsta liðið sem tryggði sér sæti í undanúrslitum Poweradebikar karla í handknattleik með öruggum sigri á ÍR í Seljaskóla í kvöld, 34:23. Framliðið lék mjög góðan leik frá upphafi til enda. Þeir voru skiplagðir og agaðir og ofan á annað átti Lárus Helgi Ólafsson mjög góðan leik í markinu sem auðveldaði ÍR-ingum ekki róðurinn.
Leikmenn Fram byrjuðu leikinn af miklum krafti og skoruðu fimm af fyrstu sex mörkum leik og gáfu þar með tóninn fyrir framhaldið. Staðan í hálfleik var 18:12 fyrir Fram. ÍR-ingar náðu nokkrum sinnum að saxa á forskot Framara án þess þó að leikurinn yrði spennandi. Síðasti stundarfjórðungurinn var eiga Framliðsins sem nýtti vel breiddina í leikmannahópnum. Varnarleikurinn var afar góður og sóknarleikurinn skipulagður og vel leikinn.
Undanúrslit Poweradebikarkeppni karla fara fram fimmtudaginn 16. mars.
Mörk ÍR: Dagur Sverrir Kristjánsson 6/1, Viktor Sigurðsson 5, Róbert Snær Örvarsson 3, Sveinn Brynjar Agnarsson 3, Arnar Freyr Guðmundsson 2/1, Bergþór Róbertsson 1, Hrannar Ingi Jóhannsson 1, Friðrik Hólm Jónsson 1, Eyþór Ari Waage 1.
Varin skot: Ólafur Rafn Gíslason 14/1, 31,1% – Rökkvi Pacheco Steinunnarson 1, 25%.
Mörk Fram: Þorvaldur Tryggvason 7, Marko Coric 4, Þorsteinn Gauti Hjálmarsson 4, Luka Vukicevic 4, Ólafur Brim Stefánsson 4, Breki Dagsson 3, Reynir Þór Stefánsson 3/1, Stefán Orri Arnalds 2, Kjartan Þór Júlíusson 1, Ívar logi Styrmirsson 1, Arnar Snær Magnússon 1.
Varin skot: Lárus Helgi Ólafsson 14, 42,4% – Magnús Gunnar Erlendsson 3, 42,9%.
