Framkomu Sigurðar vísað til aganefndar HSÍ

Framkvæmdastjóri HSÍ hefur vísað til skoðunar aganefndar meinta framkomu og hegðun Sigurðar Bragasonar þjálfara kvennaliðs ÍBV eftir leik ÍBV og Vals í Olísdeild kvenna í Vestmannaeyjum á síðasta laugardag.

Af hálfu framkvæmdastjóra er meintri framkomu Sigurðar eftir fyrrgreindan leik vísað til aganefndar á grundvelli 18. greinar í agareglunum sem snýr m.a. að hvers kyns ósæmilegri framkomu utan leiksins gagnvart starfmanni og leikmanni Vals, eftir því sem næst verður komist.

Erindið verður tekið fyrir á fundi nefndarinnar í dag. Sennilega verður ekki úrskurðað fyrr en eftir nokkra daga þegar aganefnd hefur aflað sér gagna í málinu frá báðum málsaðilum.