„Frammistaðan var okkur ekki til sóma. Við vildum og ætluðum að gera mikið betur,” sagði Saga Sif Gísladóttir markvörður Aftureldingar í viðtali við handbolta.is í kvöld. Hún, eins og aðrir leikmenn liðsins, var hundóánægð, eftir stórt tap fyrir Stjörnunni í Olísdeild kvenna á heimavelli í kvöld, 32:20.
„Leikurinn var okkur mjög mikilvægur í baráttunni sem við erum í og þess vegna þurfum við að gera mikið betur,“ sagði Saga Sif.
„Við getum engum öðrum en okkur sjálfum um kennt hvernig fór. Við misstum boltann hvað eftir annað í hendurnar á Stjörnuliðinu. Við stóðum ekki vörnina nógu vel og fórum illa með upplögð marktækifæri. Við verðum að fara vel yfir okkar leik og gera mikið betur,“ sagði Saga Sif Gísladóttir markvörður Aftureldingar en liðið er nú komið í sjötta sæti Olísdeildar, stigi á eftir Stjörnunni og stigi fyrir ofan KA/Þór þegar fimm umferðir eru eftir.
Neðsta liðið fellur úr Olísdeildinni, það næsta neðsta fer í umspil um áframhaldandi veru í deildinni en það sem hreppir sjötta sætið tekur þátt í úrslitakeppninni um Íslandsmeistaratitilinn.
Staðan og næstu leikir í Olísdeildum.
