Áfram heldur Fredericia HK að vinna leiki sína í dönsku úrvalsdeildinni undir stjórn Guðmundar Þórðar Guðmundssonar. Í gærkvöld lagði Fredericia HK grannliðið, Kolding, 32:31, í hörkuleik á heimavelli. Staðan var jöfn eftir fyrri hálfleik, 16:16. Um var að ræða upphafsleik 9. umferðar deildarinnar.
Einar Þorsteinn Ólafsson var í leikmannahópi Fredericia HK en óvíst hversu aðsópsmikill hann var á leikvellinum.
Sigurinn var e.t.v. ekki eins naumur og úrslitin gefa til kynna því leikmenn Kolding, sem sitja á botni deildarinnar, skoruðu síðasta markið.
Fredericia HK er í öðru sæti dönsku úrvalsdeildarinnar með 13 stig eftir níu leiki, þremur stigum á eftir Aalborg sem á leik inni.
Mors/Thy er í þriðja sæti með 12 stig og á einnig leik til góða á Fredericia HK. Mors-liðar hafa komið á óvart með frammistöðu sinni til þessa og eru ekki ólíkir Kolding-liðinu á síðustu leiktíð sem fór af stað með miklum hvelli.
Nánar má sjá stöðuna í dönsku úrvalsdeildinni og fleiri deildum Evrópu með því að smella hér.
