„Við getum svo sem sagt að ég hugsi málið en ég var búinn að ákveða það að láta gott heita eftir þetta tímabil,“ sagði línumaðurinn þrautreyndi hjá Aftureldingu, Einar Ingi Hrafnsson, sem gaf sterklega í skyn eftir tap Aftureldingar fyrir Haukum í oddaviðureign undanúrslita að Varmá í gærkvöld að um hafi verið að ræða hans síðasta leik í Olísdeildinni með Aftureldingu.
Var tekið frá okkur
„Ég var eiginlega búinn að slá þessu föstu en það verður að koma í ljós hvað verður. Ég gerði mér vonir um að ljúka ferlinum á annan hátt. Eins og ég hef sagt í öðrum viðtölum þá ætluðum við að gera aðeins meira en það tókst ekki og mér líður eins og þetta hafi verið tekið frá okkur,“ sagði Einar sem leikið hefur í meistaraflokki í yfir 20 ár með Aftureldingu, Fram, HK, Nordhorn í Þýskalandi, Mors-Thy í Danmörku og ØIF Arendal í Noregi.
Þreyta sagði til sín
Um tapið í oddaleiknum sagði Einar Ingi: „Þetta var einhvern veginn í bland, þreyta hjá okkur og stórleikur Arons Rafns. Framan af tókst ekki nógu vel með góðar stöður og skot. Loksins þegar það tókst þá varði Aron nánast allt sem á markið kom. Þá sá maður þreytuna koma yfir mannskapinn. Þreytan segir fljótt til sín þegar maður lendir hvað eftir annað á vegg,“ sagði Einar Ingi.
Komumst ekki upp brekkuna
„Við vorum vongóðir þegar síðari hálfleikur hófst. Vörnin hafði haldið vel, markvarslan var mjög góð og við höfðum að minnsta kosti skorað nógu mörg mörk til þess að vera með yfirhöndina eftir fyrri hálfleik. Svo lentum við í brekku í síðari hálfleik. Við komumst aldrei upp úr henni, því miður,“ sagði Einar Ingi Hrafnsson handknattleiksmaður hjá bikarmeisturum Aftureldingar í samtali við handbolta.is í gærkvöld.
