Teitur Örn Einarsson og samherjar í þýska liðinu Flensburg bjuggu sig undir leikinn við Val í Evrópudeildinni á þriðjudagskvöldið í Origohöllinni með heimsókn til Arnars Freys Arnarssonar, Elvars Arnar Jónsson og samherja í MT Melsungen í dag.
Jafntefli varð niðurstaða leiksins, 25:25. Litáinn Aidenas Malasinkas skoraði jöfnunarmark Melsungen nokkrum sekúndum áður en leiktíminn var úti.
Flensburg komst þar með upp í fjórða sæti deildarinnar með 18 stig eftir 13 leiki, stigi fyrir ofan en tveimur leikjum á undan ríkjandi meisturum SC Magdeburg.
Teitur Örn skoraði eitt mark fyrir Flensburg að þessu sinni.
Elvar Örn skoraði þrjú mörk fyrir Melsungen og var tvisvar vísað af leikvelli. Arnar Freyr skoraði tvisvar. Hann hefur jafnað sig af tognun sem hann hlaut í leik fyrir viku. Kai Häfner var markahæstur hjá Melsungen með sjö mörk. Hinn dansk/þýski Hans Aaron Mensing skoraði fimm mörk fyrir Flensburg.
Melsungen er komið upp í sjöunda sæti deildarinnar eftir að hafa leikið sjö leiki í röð án taps.
