Gísli Þorgeir Kristjánsson fór af leikvelli meiddur á ökkla rétt fyrir miðjan fyrri hálfleik í gær í leik SC Magdeburg og Wisla Plock í átta liða úrslitum Meistaradeildar Evrópu í handknattleik. Hann kom ekkert meira við sögu í leiknum sem fram fór í Póllandi og lauk með jafntefli, 22:22.
Síðari viðureignin fer fram í Magdeburg í næstu viku. Ekki voru meiri upplýsingar að finna í morgun um alvarleika meiðsla Gísla Þorgeirs sem farið hefur á kostum í vetur og m.a. skorað 75 mörk í 15 leikjum Meistaradeildarinnar.
Magdeburg komst í vænlega stöðu í leiknum í Plock í gær og var m.a. sex mörkum yfir, 15:9, snemma í síðari hálfleik og aftur 18:13. Leikmenn Plock hafa sýnt að þeir eru til alls líklegir eins og rimma þeirra við Nantes í fyrstu umferð útsláttarkeppni Meistaradeildarinnar undirstrikaði.
Daninn Michael Damgaard var markahæstur hjá Magdeburg með átta mörk. Næstur var Kay Smits með sex mörk. Lovro Mihic og Sergei Kostorotov skoruðu fjögur mörk hvor fyrir Wisla Plock.
Þungur róður framundan
Franska liðið PSG vann THW Kiel, 31:27, í Þýskalandi í hinni viðureign 16-liða úrslitum Meistaradeildar karla í gærkvöld. Þar með er ljóst að á brattann verður að sækja fyrir þýska liðið í síðari leiknum sem fram fer í París.
Norðmennirnir Sander Sagosen og Harald Reinkind voru markahæstir hjá Kiel. Sagosen skoraði níu sinnum en Reinkind í fimm skipti. Danis Kristopans skoraði sex mörk fyrir PSG eins og Ferran Solé, Kamil Syprzak og Elohim Prandi.
