Gísli Þorgeir Kristjánsson Evrópumeistari í handknattleik með þýska liðinu SC Magdeburg og landsliðsmaður í handknattleik var á dögunum veitt gullmerki FH, uppeldisfélags síns. Tilefnið var það helst að Gísli Þorgeir var valinn besti leikmaður úrslitahelgar Meistaradeildar Evrópu í júní og einnig besti leikmaður þýsku 1. deildarinnar.
Viðar Halldórsson, formaður FH, og Ingvar Viktorsson, formaður orðunefndar FH, veittu Gísla Þorgeiri gullmerki FH í Kaplakrika. Gísli Þorgeir hefur verið heima á Íslandi og sinnt þar endurhæfingu eftir aðgerð í sumar eftir að hann fór úr axlarlið í undanúrslitaleik Meistaradeildarinnar. Hann lét meiðslin ekki aftra sér frá að taka þátt í úrslitaleiknum daginn eftir og fara hamförum.
Vonir standa til þess að Gísli Þorgeir geti tekið upp þráðinn á handknattleiksvellinum öðrum hvorum megin við áramót.
FH setti saman myndskeið með klippum úr mörgum leikjum Gísla Þorgeirs á ferlinum og birtir á Facebook síðu FH handbolti. Því miður hefur handbolti.is ekki heimild til þess að birta myndbandið en bendir áhugasömum á Facebook-síðuna, FH handbolti.
