Handbolti.is óskar lesendum, auglýsendum og öðrum sem styðja við bakið á útgáfunni, gleðilegra jóla og farsældar með ósk um að allir megi njóta friðsældar og hamingju yfir hátíðina
Að innstu afdals bæjum,
um yztu nes og skaga,
berst hringing helgra daga,
sem húm í skauti fól,
og enn hin sama saga
er sögð og haldin jól.
Í köldum, snauðum kotum
er kveikt á öllum bríkum,
og flest í nýjum flíkum
er fólkið þar í kveld.
Með rétt, sem hæfir „ríkum“,
er ráðskað fram við eld.
Og fyrr en undir óttu
fer enginn þar að sofa,
og ljósum flestir lofa
að lifa þessa nótt.
Í höll og kotungskofa
er kyrrt og stillt og hljótt.
Og enginn heiftarhugur
nú hreyfir minnsta uggann,
því gegnum trúar-gluggann
menn gá í helgri kyrrð.
En útsýn yfir skuggann
er efasemdum byrgð.
En gott á hver, sem getur
sig geislum trúar vafið
og fyrir handan hafið
séð hilla fegri svið.
Hann getur úr þeim grafið
sér gullið – sálarfrið.
(Jól – eftir Jakob Thorarensen, 1886 – 1972).
- Fréttavakt verður á handbolti.is jóladagana eins og aðra daga ársins þótt uppfærslur verði strjálli en oft áður.
- Hægt er að senda ábendingar um fréttir á handbolti@handbolti.is eða í gegnum skilaboðaskjóðu Facebook.
- Auglýsingadeildin er einnig opin yfir hátíðina eins og aðra daga. Netfangið er auglysingar@handbolti.is.
