„Miðað við hversu margir eru háværir, hversu mikil þörfin er og hversu lengi umræðan hefur staðið yfir þá finnst mér með ólíkindum að við séum enn að ræða um byggingu þjóðarhallar. Ég mun ekki ráða því hvort eða hvenær verður hafist handa við nýja þjóðarhöll en því miður þá verður maður svartsýnni með hverju árinu sem líður án þess að eitthvað er gert,“ sagði Aron Pálmarsson, fyrirliði íslenska landsliðsins, spurður út í þá eilífðar bið sem virðist vera eftir nýrri þjóðarhöll fyrir innanhússíþróttir eins og handknattleik og körfuknattleik.
Rætt hefur um byggingu þjóðarhallar allan feril Arons með landsliðinu og gott betur. Enn er ekkert í hendi. Uppselt var á landsleikinn við Austurríki í undankeppni EM á nokkrum dögum og fengu talsvert færri miða en vildu. Leikurinn fer fram á Ásvöllum vegna þess að ofan þörfina fyrir þjóðarhöll þá hefur hin nærri 60 ára gamla Laugardalshöll verið úr leik í eitt og hálft ár eftir að vatnsleki olli miklu skemmdum.
Skandall að eiga ekki löglegan heimavöll
„Það er þreytt að heyra umræðuna um að eitthvað sé að fara að gerast en síðan gerist ekki neitt. Það er hreinlega skandall að hvorki við né karfan eigum löglegan heimavöll. Mér finnst eiginlega alveg glórulaust að við séum að tala um þetta enn eitt árið. Framkvæmdir við þjóðarhöll ættu að vera löngu byrjaðar,“ segir Aron sem einbeitir sér fyrst og fremst að því að leika með landsliðinu og gera það eins vel og honum er unnt. Hann segir að það sé ekki hægt að eyða kröftum í eitthvað sem ekki er hægt að hafa áhrif á.
Sú staðan má ekki koma upp
„Um leið og við lendum í þeim sporum að leika heimaleiki okkar utan Íslands þá verður staðan orðin vandræðaleg fyrir okkur sem þjóð. Sú staðan má ekki koma upp enda óviðundandi fyrir jafn mikla íþróttaþjóð og Ísland er,“ sagði Aron Pálmarsson, fyrirliði íslenska landsliðsins.
Aron verður í eldlínunni með íslenska landsliðinu gegn austurríska landsliðinu í umspili um heimsmeistaramótið á Ásvöllum á morgun klukkan 16. Síðustu aðgöngumiðarnir seldust á sunnudaginn.
