Meistaraflokkslið Víkings í karla- og kvennaflokki hafa verið í æfingabúðum í Los Cristianos á Tenerife frá 16. ágúst. Hópurinn kemur heim aðfaranótt næsta miðvikudags.
Liðin hafa æft tvisvar á dag, morgunæfing og seinnipartinn. Kvennaliðið lék tvo æfingaleiki í Santa Cruz, um 50 mínútna akstur frá Los Cristianos, gegn gríðarlega sterku liði sem féll úr spænsku úrvalsdeildinni í fyrra. Innan raða spænska liðsins eru meðal annars þrjár landsliðskonur frá Úkraínu, ein frá Hvíta Rússlandi, ein frá Portúgal og ein frá Argentínu. Leikirnir töpuðust báðir með nokkrum mun þrátt fyrir góða kafla Víkinga.
Leikmenn Víkingsliðanna hafa auk æfinganna fengið að njóta sólarinnar milli stífra æfinga enda hefur verið á milli 28-34 stiga hiti alla dagana.
Eina sem valdið mun hafa hafa vonbrigðum í ferðinni er árangur meistaraflokks karla í gokart-keppninni. Jón Gunnlaugur Viggósson rúllaði þeirri keppni upp með þriggja sekúndu forskoti. Þeir sem fylgjast grannt með akstursíþróttum vita að það er alveg gríðarlegur munur.
