Íslendingaliðið Ribe-Esbjerg vann góðan sigur á næst efsta liði dönsku úrvalsdeildarinnar, Mors-Thy á heimavelli í dag, 30:21, og heldur þar með áfram fimmta sæti deildarinnar með 13 stig eftir 10 leiki, fimm stigum á eftir Aalborg sem á leik inni.
Elvar Ásgeirsson skoraði þrjú mörk og gaf tvær stoðsendingar fyrir Ribe-Esbjerg. Ágúst Elí Björgvinsson markvörður varði bæði vítaköstin sem hann fékk tækifæri á að verja. Annars sat Hafnfirðingurinn á bekknum því Niklas Kraft varði eins og berserkur. Varnarleikur Ribe-Esbjerg var frábær og komust leikmenn Mors-Thy hvorki lönd né strönd.
Annari sigur hjá Halldóri
Halldór Jóhann Sigfússon og lærisveinar hans í Nordsjælland unnu Kolding, 29:28, á Jótlandi. Sigurinn var Nordsjælland afar mikilvægur í botnbaráttunni. Nordsjælland er þar með komið upp í níunda sæti eftir tvo sigurleiki í röð en um síðustu helgi lagði liði meistara GOG.
GOG gerði það gott í dag og vann Bjerringbro/Silkeborg á heimavelli, 33:28.
Staðan í dönsku úrvalsdeildinni og fleiri deildum Evrópu er að finna hér.
