Lífið lék við íslensku landsliðskonurnar Díönu Dögg Magnúsdóttur og Söndru Erlingsdóttur og lið þeirra í leikjum þýsku 1. deildarinnar í handknattleik í dag. Sandra og samherjar í TuS Metzingen unnu Buxtehuder, 29:23, á heimavelli og smelltu sér í 6. sæti deildarinnar. Díana Dögg og hennar félagar í BSV Sachsen Zwickau unnu langþráðan sigur og það á útivelli í heimsókn til botnliðsins Sport-Union Neckarsulm, 34:29. Þetta var annar sigur BSV Sachsen Zwickau og mjakaðist liðið upp um eitt sæti, í það ellefta af 14 með fjögur stig þegar sex umferðir eru að baki.
Þremur stigum frá toppnum
Sandra skoraði tvö mörk úr vítaköstum í sigri TuS Metzingen á heimavelli en liðið var þremur mörkum yfir að loknum fyrri hálfleik, 16:13. TuS Metzingen er aðeins þremur stigum á eftir Bietigheim og Bensheim sem deila efsta sæti deildarinnar um þessar mundir með 11 stig hvort.
Öruggt á útivelli
Díana Dögg skoraði fjögur mörk, átti fjórar stoðsendingar og tvö sköpuð færi í fimm marka sigri Zwickau-liðsins á úthverfaliðinu í Stuttgart, Neckarsulm, 34:29. Sjö mörkum skakkaði á liðunum þegar fyrri hálfleikur var afstaðinn, 17:10. Einnig vann Díana Dögg tvö vítaköst, náði þremur fráköstum en mátti einnig bíta í súra eplið í tvígang og vera vikið af leikvelli.
Bikarinn næstur á dagskrá
Átta liða úrslit bikarkeppninnar eru næst á dagskrá. Sandra og félagar mæta Solingen á miðvikudaginn.
Lið Díönu er úr leik í bikarnum og á því frí frá kappleikjum um næstu helgi. Næsta viðureign BSV Sachsen Zwickau í deildinni verður annan miðvikudag gegn meisturum Bietigheim.
TuS Metzingen með Söndru innanborðs á næsta deildarleik við Oldenburg sunnudaginn 12. nóvember.
Stöðuna í þýsku 1. deild kvenna og fleiri deildum Evrópu er að finna hér.
