Það verður á brattann að sækja hjá kvennaliði ÍBV á morgun eftir sjö marka tap í kvöld í fyrri viðureigninni við Madeira Andebol SAD, 30:23, á portúgölsku eyjunni Madeira, sunnarlega í Atlantshafi. Um var að ræða fyrri viðureign liðanna í 3. umferð Evrópubikarkeppninnar og varð það niðurstaðan að leika báða leikina í Funchal Playing Hall á Madeira.
Madeira Andebol SAD var fimm mörkum yfir í hálfleik, 16:11, og hafði yfirhöndina frá upphafi leiks. Ekki var það síst að þakka Isabel Góis markverði sem reyndist sannarlega betri en engin í markinu, eins og einhverntímann var sagt. Þegar upp var staðið og leikurinn gerður upp var Góis með 15 varin skot, 43%.
Madeira Andebol SAD hefur leikið fimm leiki í portúgölsku 1. deildinni fram til þess og unnið þá alla.
Síðari viðureign liðanna hefst klukkan 17 á morgun, sunnudag.
Mörk ÍBV: Hrafnhildur Hanna Þrastardóttir 7, Elísa Elíasdóttir 4, Sunna Jónsdóttir 3, Ingibjørg Olsen 2, Harpa Valey Gylfadóttir 2, Marija Jovanovic 2, Ásta Björt Júlíusdóttir 1, Birna Berg Haraldsdóttir 1, Sara Dröfn Ríkharðsdóttir 1.
Varin skot: Marta Wawrzynkowska 9, 28%.
