Sænski handknattleiksmaðurinn Jim Gottfridsson var kjörinn besti handknattleiksmaður ársins 2022 í árlegu vali vefsíðunnar Handball-Planet sem kynnti niðurstöðuna í gærkvöld. Gottfridsson er fyrsti Svíinn sem hreppir hnossið í kjöri vefsíðunnar en hún hefur staðið fyrir því frá 2011 í samstarfi við lesendur sína og valinn hóp fjölmiðlamanna sem fylgjast reglulega með handknattleik.
Enginn Íslendingur
Einnig hefur verið upplýst hvaða leikmenn þóttu skara fram úr í einstaka stöðum á leikvellinum. Hægt var að greiða þremur íslenskum handknattleiksmönnum atkvæði í því kjöri, Bjarka Má Elíssyni, Gísla Þorgeiri Kristjánssyni og Ómari Inga Magnússyni. Skemmst er frá því að segja að enginn þeirra varð efstur í sínum flokki.
Batt enda á 20 ára bið
Alls greiddu nærri 50 þúsund atkvæði í kjörinu í ár. Gottfridsson stóð upp í valinu eftir að hafa átt afar gott keppnisár þar sem vafalaust stóð hæst frammistaða hans á Evrópumótinu sem haldið var í Ungverjalandi og Slóvakíu í upphafi ársins. Gottfridsson átti einna stærstan þátt í að Svíar unnu mótið og urðu Evrópumeistarar í handknattleik karla í fyrsta sinn í tvo áratugi.
Næstur á eftir Gottfridsson í kjörinu varð Spánverjinn Aleix Gomes. Frakkinn Dida Memd hlaut þriðja sætið. Á eftir komu Mikkel Hansen, Hampus Wanne og Gonzalo Pérez de Vargas.
Handboltakarlar ársins hjá Handball-Planet: 2011 – Laszlo Nagy. 2012 – Filip Jicha. 2013 – Domagoj Duvnjak. 2014 – Nikola Karabatic. 2015 – Nikola Karabatic. 2016 – Mikkel Hansen. 2017 – Arpad Sterbik. 2018 – Sander Sagosen. 2019 – Mikkel Hansen. 2020 – Sander Sagosen. 2021 – Mikkel Hansen. 2022 – Jim Gottfridsson.
