- Auglýsing -

Greiða eina milljón evra og verða með

Ivan Cupic og félagar í Vardar verða með í Meistaradeild Evrópu á næsta keppnistímabili. Mynd/EPA

Vardar Skopje verður ekki meinuð þátttaka í Meistaradeild karla í handknattleik á næsta keppnistímabili eins og hætta var á. Forseti félagsins, Mihajlo Mihajlosvski, hefur lagt niður skottið og ákveðið að reiða fram eina milljóna evra í tryggingu eins og Handknattleikssamband Evrópu, EHF, hefur sett sem skilyrði fyrir þátttökunni. Mihajlosvski sagði í lok júní að ekki væri nokkur stoð fyrir kröfum EHF og ekki kæmi til greina að verða við henni.


Í viðtali við fréttamiðilinn 24rakomet.mk í Norður-Makedóníu staðfestir forsetinn hinsvegar að upphæðin verði greidd fyrir tilsettan tíma, í síðasta lagi 27. júlí, og Vardar verði þar með þátttakandi í Meistaradeild Evrópu.


EHF hafði hótað því að yrði tryggingin ekki greidd yrðu Gorenje Velenje, slóvensku meistararnir, kallaðir til leiks og þátttaka Vardar felld niður.
Tryggingin, ein milljón evra eða jafnvirði um 150 milljóna króna, er vegna málareksturs sem stendur á yfir á milli EHF og Vardar.

Mihajlosvski hefur haldið því fram að sá málarekstur tengist ekki núverandi félagi, Vardar 1961, sem stofnað var fyrir fáeinum árum á rústum Vardar Skopje sem varð gjaldþrota. Á þær röksemdir hefur EHF ekki fallist enda hafi núverandi félag m.a. tekið við keppnisleyfi fyrrverandi félags og fyrir vikið m.a. leikið í Meistaradeildinni tvö síðustu keppnistímabil.

- Auglýsing -
- Auglýsing -

Nýjustu fréttir

- Auglýsing -