Grótta krækir í liðsauka frá Val

Áki Hlynur Andrason hefur skrifað undir tveggja ára samning við handknattleiksdeild Gróttu. Áki er 21 árs gamall og kemur úr herbúðum Vals þar sem hann er uppalinn. Undanfarin fjögur ár hefur Áki Hlynur leikið með ungmennaliði Vals og í vetur hefur hann skorað 93 mörk í Grill 66-deildinni. 

Áki leikur í vinstri skyttustöðunni en getur leyst allar aðrar stöðurnar fyrir utan. Hann mun styrkja lið Gróttu til muna á næsta keppnistímabili, segir í tilkynningu frá handknattleiksdeild Gróttu.

„Áki Hlynur er ungur og spennandi leikmaður sem okkur hlakkar mikið til að vinna með,“ sagði Róbert Gunnarsson þjálfari Gróttu í fyrrgreindri tilkynningu frá handknattleiksdeild Gróttu.