Andri Sigmarsson Scheving sá til þess að Afturelding fór með annað stigið heim úr heimsókn sinni til Gróttu í Olísdeild karla í handknattleik í Hertzhöllinni á Seltjarnarnesi í kvöld. Hann varði frá Ólafi Brim Stefánssyni, leikmanni Gróttu, þegar tvær sekúndur voru eftir af leiktímanum. Niðurstaðan var 28:28 í leiknum. Grótta var marki yfir að loknum fyrri hálfleik, 14:13, og var þremur mörkum yfir, 27:24, þegar sjö mínútur voru eftir af leiktímanum.
Mosfellingar áttu svo sem líka sín færi. Þeir fengu tvö marktækifæri á síðustu mínútunni í jafnri stöðu en tókst ekki að skora hjá Einari Baldvin Baldvinssyni, markverði Gróttu, sem varði allt hvað af tók í síðari hálfleik eftir að hafa verið daufur í þeim fyrri.
Afturelding hefur þar með 18 stig eftir 17 leiki eins og Stjarnan og Selfoss í fimmta til sjöunda sæti. Afturelding hefur nú gert tvö jafntefli á útivelli í röð.
Þetta var annað jafntefli Gróttu í röð á heimavelli í jafnmörgum leikjum. Grótta er í tíunda sæti með 11 stig og er þremur á eftir Fram.
Vafalaust naga leikmenn beggja liða sig í handarbökin yfir að hafa ekki krækt í bæði stigin, ekki síst Gróttumenn sem voru komnir í vænlega stöðu. Þeim brast kjarkur og kannski þrek á lokakaflanum.
Mosfellingar náðu að bjarga sér úr erfiðri stöðu eftir að hafa átt undir högg að sækja lengst af síðari hálfleiks.
Mörk Gróttu: Birgir Steinn Jónsson 10, Andri Þór Helgason 6/5, Sveinn Brynjar Agnarsson 4, Ólafur Brim Stefánsson 2, Hannes Grimm 2, Ágúst Emil Grétarsson 1, Akimasa Abe 1, Einar Baldvin Baldvinsson 1, Ívar Logi Styrmisson 1.
Varin skot: Einar Baldvin Baldvinsson 13, 33,3%, Ísak Arnar Kolbeins 1, 50%.
Mörk Aftureldingar: Blær Hinriksson 8, Birkir Benediktsson 4, Bergvin Þór Gíslason 4/1, Úlfar Páll Monsi Þórðarson 4/2, Einar Ingi Hrafnsson 3, Sveinn Andri Sveinsson 3, Þorsteinn Leó Gunnarsson 2.
Varin skot: Andri Sigmarsson Scheving 15, 35,7%.
Tölfræði leiksins er að finna hjá HBStatz.
Stöðuna í Olísdeild karla er að finna hér.
Handbolti.is var í Hertzhöll Seltirninga og fylgdist með leiknum í beinni stöðu- og textauppfærslu hér fyrir neðan.
