Guðjón Valur Sigurðsson og lærisveinar hans í Gummersbach eru með fjögurra stiga forskot í efsta sæti þýsku 2. deildarinnar í handknattleik eftir sigur á Empor Rostock á heimavelli í kvöld, 39:26. Gummersbach er fjórum stigum á undan Nordhorn sem er í öðru sæti. Nordhorn tapaði í kvöld í heimsókn sinni til Bietigheim í Stuttgart, 30:23.
Elliði Snær markahæstur
Eyjamaðurinn Elliði Snær Viðarsson var markahæstur liðsmanna Gummersbach með fimm mörk í fimm skotum. Honum var einu sinni vísað af leikvelli í tvær mínútur. Martin Nagy, fyrrverandi markvörður Vals, varði 11 skot og var í marki Gummersbach frá upphafi til enda leiksins.
Tumi Steinn Rúnarsson og samherjar í Coburg unnu mikilvægan sigur á Ludwigshafen á heimavelli, 32:31. Coburg er í 14. sæti og þiggur öll stig með þökkum um þessar mundir. Tumi Steinn skoraði tvö mörk fyrir Coburg.
Örn átti hörkufínan leik
Örn Vésteinsson Östenberg var markahæstur hjá TV Emsdetten með sex mörk þegar liðið önglaði í mikilvægt stig á útivelli í heimsókn sinni til Eintracht Hagen, 26:26. Anton Rúnarsson skoraði þrisvar fyrir Emsdetten-liðið sem veitir ekki af hverju stigi sem það getur náð í til þess að forðast fall úr deildinni.
Hvorki gengur né rekur
Hvorki gengur né rekur hjá EHV Aue þessar vikurnar og enn jukust raunir leikmanna í kvöld með fjögurra marka tapi fyrir Rimpar Wölfe, 28:24, á útivelli. Arnar Birkir Hálfdánsson skoraði fjögur mörk og átti eina stoðsendingu fyrir Aue sem er í slæmum málum í næst neðsta sæti. Sveinbjörn Pétursson stóð stutt við í marki Aue, aðeins í um sjö mínútur og varði ekki skot.
Úrslit kvöldsins í 2. deild:
Bietigheim – Nordhorn 30:23.
Gummersbach – Empor Rostock 39:26.
Coburg – Ludwigsahafen 32:31.
Dessauer – Doremagen 35:28.
Elbflorenz – Hamm-Westfalen 33:28.
Ferndorf – Essen 30:32.
E.Hagen – Emsdetten 26:26.
Lübeck-Schwartau – Grosswallstadt 29:26.
Eisenach – Hüttenberg 36:29.
Rimpar – EJHV Aue 28:24.
Staðan:
