Ekki ríkir bjartsýni á að tríó Íslendinga og markvörðurinn Phil Döhler styrki nýliða HF Karlskrona svo hressilega að liðið haldi sæti sínu í sænsku úrvalsdeildinni í karlaflokki þegar upp verður staðið í vor. Í árlegri spá þjálfara deildarinnar er HF Karlskrona og Lugi HF spáð falli. Spáin var birt í morgun en keppni í sænsku úrvalsdeildinni hefst á föstudaginn.
Auk Döhlers markvarðar sem kom frá FH bættust Dagur Sverrir Kristjánsson, Ólafur Andrés Guðmundsson og Þorgils Jón Svölu Baldursson í hópinn hjá Karlskrona í sumar. Liðið komst upp í úrvalsdeildina eftir umspil.
Hinum nýliðum sænsku úrvalsdeildarinnar, Amo HK, sem Arnar Birkir Hálfdánsson samdi við í sumar, er spáð áttunda sæti og þar með að ná sæti í úrslitakeppninni.
Endurtekið efni?
IFK Kristianstad, grannliði HF Karlskrona, er spáð efsta sæti deildarinnar. IFK Kristianstad varð sænskur meistari í vor og greinilegt að leikmenn liðsins þykja líklegastir til að endurtaka leikinn í vor. Tryggvi Þórisson og samherjar í IK Sävehof hafna í öðru sæti annað árið í röð, gangi spáin eftir.
Nýliðar HF Karlskrona og Amo HK mætast í upphafsleik sænsku úrvalsdeildarinnar í Karlskrona á föstudaginn.
