Ekkert verður af því að KA/Þór taki þátt í Evrópubikarkeppninni í handknattleik kvenna. Ákveðið hefur verið að draga liðið úr keppni, samkvæmt upplýsingum sem handbolti.is fékk nú í morgunsárið.
Ástæða þessarar ákvörðunar er fyrst og fremst útbreiðsla kórónuveirunnar sem fer sem eldur í sinu um Evrópu um þessar mundir, þar á meðal hér á landi. Vegna þess er ljóst að ekki verður hægt að koma leikjunum við, hvorki hér á landi né á Ítalíu þar sem væntanlegir andstæðingar KA/Þórs búa.
KA/Þór, sem ætlaði að taka þátt í Evrópukeppni félagsliða í fyrsta sinn í sögu sinni, átti að mæta ítalska liðinu Jomi Salerno keppninni 14. eða 15. nóvember og aftur viku síðar.
Eftir að dregið var til þriðju umferðar keppninnar eftir miðjan síðasta mánuð freistuði forsvarsmenn KA/Þórs að semja við ítalska liðið um að báðir leikirnir færu fram hér á landi. Síðan hefur frekar hallað undan fæti í baráttunni við kórónuveiruna og nánast útilokað að koma leikjunum á eins og málum er háttað. Þess vegna var fátt annað að gera í stöðunni en að taka þessa ákvörðun þótt henni fylgi vonbrigði.
