Handknattleiksmaðurinn Hafþór Már Vignisson hefur skrifað undir samning við Þór Akureyri og leikur með liðinu í Grill 66-deildinni á næstu leiktíð. Þór tilkynnti um komu Hafþórs Más í kvöld á samfélagsmiðlum. Segja má að hann sé kominn heim. Hafþór Már er Þórsari að upplagi en lék síðast með Akureyri handboltafélaginu út leiktíðina vorið 2019.
Hafþór Már lék síðast með ØIF Arendal í norsku úrvalsdeildinni en meiddist snemma á þessu ári og kom ekkert meira við sögu eftir það. Hann hafði þá verið í herbúðum félagsins í hálft annað ár.
Þegar Hafþór Már yfirgaf Akureyri handboltafélag vorið 2019 gekk hann til liðs við ÍR. Þar á eftir var hann með Stjörnunni í tvö ár. Eftir dvölina í Garðabæ fór Hafþór Már til Empor Rostock í þýsku 2. deildinni en hélt þaðan til Noregs.
Hafþór Már, sem er örvhent skytta, er annar leikmaðurinn sem Þór fær fyrir komandi leiktíð. Nokkuð er síðan Oddur Gretarsson ákvað að koma heim eftir langa veru í Þýskalandi og leggjast á árar með Þórsurum.
Þór tapaði á dögunum í oddaleik fyrir Fjölni í umspili um sæti í Olísdeildinni og verður þar með áfram í Grill 66-deildinni á næstu leiktíð.
