Þýska handknattleiksliðið HSV Hamburg, sem Einar Þorsteinn Ólafsson landsliðsmaður í handknattleik ætlar að ganga til liðs við í sumar fékk ekki endurnýjað keppnisleyfi hjá stjórn deildarkeppninni í Þýskalandi. Félagið hefur frest til 5. maí til þess að uppfylla skilyrði sem snúa að fjármálum þess varðandi rekstur næstu leiktíðar og greislu skulda.
Fjármálin hafa löngum verið laus í reipunum hjá HSV Hamburg og skuldir safnast fyrir. Félagið var stóð í málaferlum við stjórn deildarkeppninnar síðasta sumar eftir að því var synjað um keppnisleyfi vegna skulda og ófullnægjandi upplýsinga um hvernig skuldastabbinn yrði unninn niður. Nú virðist svipað vera upp á teningnum. Alltént uppfyllir félagið ekki kröfur gerðar eru og hefur verið gefinn frestur til þess að vinna í sínum málum.
Strangt eftirlit er með fjármálum félaganna í tveimur efstu deildum þýska handknattleiksins. Rassvasabókhald er ekki liðið. Félögin verða að skila inn ábyggilegum og endurskoðuðum fjárhagsáætlunum fyrir hvert tímabil til þess að fá keppnisleyfi. Er það gert til þess að koma í veg fyrir gjaldþrot sem voru tíð á árum áður þegar mönnum sást oft ekki fyrir í rekstrinum og eyddu umfram efni eða treystu um of á guð og lukkuna.
