- Auglýsing -
Sæunn Magnúsdóttir var í gærkvöld kjörin formaður aðalstjórnar ÍBV á framhaldsaðalfundi. Aðrir sem náðu kjöri í aðalstjórn eru Arnar Richardsson, Bragi Magnússon, Erlendur Ágúst Stefánsson, Kári Kristján Kristjánsson, Örvar Omrí Ólafsson og Sara Rós Einarsdóttir. Varamenn eru Guðmunda Bjarnadóttir og Jakob Möller. Sæunn var ein í kjöri til formanns.
Eyjafréttir segja að mikil handboltaslagsíða sé í nýrri stjórn en að Örvari undanskildum eru allir aðalmenn sagðir tengdir handboltanum með einum eða öðrum hætti. Í fréttinni segir ennfremur að um hallarbyltingu hafi verið að ræða og að handboltafólk hafi verið áberandi á fjölmennum fundi.
Enginn aðalmaður fráfarandi stjórnar hlaut brautargengi við kjör til nýrrar stjórnar.
Eins og mörgum er eflaust í fersku minni sagði stjórn handknattleiksráðs ÍBV af sér í vor vegna mikillar óánægju með ákvörðun aðalstjórnar ÍBV um að breyta skiptingu tekna af sameiginlegri fjáröflun handknattleiks- og knattspyrnudeilda félagsins. Sverðin voru slíðruð í sumar og nefnd skipuð til þess að leiða tekjuskiptinguna til lykta.
Sæunn, nýr formaður ÍBV, er systir landsliðskonunnar í handknattleik, Díönu Daggar Magnúsdóttur, sem leikur með þýska 1. deildarliðinu BSV Sachsen Zwickau.
- Auglýsing -
