- Auglýsing -
Óskað hefur verið eftir lögreglurannsókn á einkar óeðliegum úrslitum tveggja leikja í serbneska kvennahandknattleiknum, eftir því sem balkan-handball greinir frá í morgun. Sterkur grunur leikur á um að úrslitum hafi verið hagrætt og að maðkur sé í mysunni.
Annarsvegar er um að ræða sigur ZRK Temerin á ZRK Ravangrad, 86:15, og hinsvegar viðureign RK Ruma og ZRK Mokrin sem lauk með sigri fyrrnefnda liðsins, 47:18. Báðir leikir fóru fram á dögunum.
ZRK Temerin og RK Ruma eru í harðri baráttu um að flytjast upp á milli deilda í serbnesku deildarkeppninni og mun heildarmarkatalan ráða hvort þeirra hreppir hnossið.
Úrslit leikjanna þykja ekki eðlileg, ekki síst niðurstaðan í viðureign ZRK Temerin og ZRK Ravangrad, 86:15! Staðan að loknum fyrri hálfleik var 43:5.
Málið kom inn á borð serbneska handknattleikssambandsins í gær eftir að fjölmiðlar þar í landi höfðu vakið athygli á að úrslitin væri í hæsta máta óeðlieg. Óskaði sambandi eftir að lögregla færi ofan í saumana leikjunum og úrslitum þeirra.
- Auglýsing -
