Hanna Guðrún Stefánsdóttir handknattleikskona og fyrrverandi landsliðsmaður var sæmd gullmerki HSÍ í gær á uppskeruhófi Handknattleikssambands Íslands fyrir langan og frábæran feril á handboltavellinum. Hanna Guðrún ákvað í lok leiktíðar í vor að leggja keppnisskóna frá sér eftir að hafa sleitulaust leikið í meistaraflokki frá 1995.
Hanna Guðrún lék lengi vel með Haukum en færði sig síðan yfir til Stjörnunnar árið 2010. Keppnistímabilið 2003/2004 lék hún með Team Tvis Holstebro í Danmörku.
Hanna Guðrún á að baki 142 landsleiki og er næst leikjahæsta landsliðskona Íslands. Mörkin með landsliðinu eru 458. Hún tók þátt í EM 2010 og 2012 og HM 2011, einu stórmótum landsliðsins til þessa.
Á ferlinum varð Hanna Guðrún fimm sinnum Íslandsmeistari og jafnoft bikarmeistari. Einnig varð hún markadrottning efstu deildar í fimm skipti. Leiða má sterkum líkum að því að engin kona hafi skorað fleiri mörk í deildarkeppni hér á landi frá upphafi en Hanna Guðrún. Samkvæmt óstaðfestum upplýsingum eru mörkin eitthvað vel á þriðja þúsund.
