Harpa Rut og félagar jöfnuðu metin

Harpa Rut Jónsdóttir og samherjar hennar í GC Amicitia Zürich halda áfram að gera það gott í úrslitakeppninni um svissneska meistaratitilinn í handknattleik. Í gær unnu þær deildarmesitara LC Brühl Handball, 27:26, á heimavelli.

Þar með er staðan jöfn, hvort lið hefur einn vinning. Næsti leikur liðanna verður í St. Gallen á miðvikudaginn. Fjórða viðureign verður í Zürich á laugardaginn. Liðið sem fyrr vinnur þrjár viðureignir vinnur meistaratitilinn.

Harpa Rut skoraði eitt mark í leiknum í gær. Hún var hörð í horn að taka í vörninni og var fyrir vikið tvisvar sinnum vikið af leikvelli.

GC Amicitia Zürich var lengst af með frumkvæðið í leiknum og hafði m.a. þriggja marka forskot í hálfleik, 15:12.