- Auglýsing -
Matas Pranckevicius, 24 ára markvörður frá Litáen, kemur til landsins á sunnudaginn og verður til reynslu hjá Haukum fram á fimmtudag með samning í huga. Aron Kristjánsson íþróttastjóri Hauka staðfesti komu Pranckevicius í samtali við handbolta.is í morgun.
Pranckevicius, sem er 192 sentímetrar á hæð og verið að banka á dyr landsliðs Litáen, er samningsbundinn Vilnius VCC Sviesa og hefur verið um árabil. Hann er samherji Giedrius Morkunas sem lék um árabil í marki Hauka við góðan orðstír.
„Við viljum skoða kosti þess að styrkja markvarðastöðuna og fá þriðja manninn inn í markvarðateymið með Stefáni og Magnúsi meðan Aron Rafn verður frá,“ sagði Aron en nafni hans Aron Rafn fékk högg á höfuðið á æfingu í mars og hefur síðan ekkert leikið eða æft með Haukum.
Aron sagði alveg óvíst hvort og þá hvenær Aron Rafn snýr aftur út á leikvöllinn til æfinga, hvað þá til keppni.
- Auglýsing -
