Ásgeir Örn Hallgrímsson hefur verið ráðinn þjálfari karlaliðs Hauka í handknattleik í stað Rúnars Sigtryggssonar sem tók í morgun við þjálfun þýska 1. deildarliðsins Leipzig. Haukar tilkynntu um ráðninguna á samfélagsmiðlum sínum fyrir skömmu. Samningur Ásgeirs Arnar og Hauka er til ársins 2025.
„Ég er gríðarlegar stoltur og þakklátur að fá tækifæri til að þjálfa uppeldisfélagið mitt sem ég ann svo heitt. Mér er sýnt mikið traust sem er ekki sjálfsagt og ætla ég mér að standa undir því. Ég þekki liðið mjög vel og hef mikla trú á verkefninu. Þetta er frábær hópur sem á mikið inni og er ég klár á því að þeir eru tilbúnir í þær baráttur sem fram undan eru. Ég hlakka því til komandi tíma á Ásvöllum,“ er haft eftir Ásgeiri Erni í tilkynningu frá Haukum.
Um er að ræða frumraun Ásgeirs Arnar í þjálfun, alltént í meistaraflokki. Hann er þrautreyndir handknattleiksmaður og lék m.a. í 13 ár sem atvinnumaður í Danmörku, Þýskalandi og í Frakklandi við góðan orðstír. Ásgeir Örn lék 255 landsleiki og var m.a. í silfurliðinu á Ólympíuleikunum 2008 í Peking bronsliðinu á EM tveimur árum síðar. Hann er einnig handhafi Fálkaorðunnar.
Ásgeir er að ljúka 3. stigi þjálfunarmenntunar HSÍ. Hann er menntaður viðskiptafræðingur og lauk MBA stjórnunarnámi frá HR árið 2020.
„Við erum gríðarlega ánægðir með að Ásgeir sé klár í slaginn með okkur. Hann er sterkur félagsmaður sem býr yfir mikilli þekkingu og reynslu sem leikmaður. Hann hefur alltaf verið mikill liðsmaður og teljum við að hann sé rétti maðurinn til að koma skútunni aftur á réttan kjöl,“ segir Aron Kristjánsson framkvæmdastjóri handknattleiksdeildar Hauka og þjálfari karlaliðs félagsins um árabil.
Haukar ráðast ekki á garðinn þar sem hann er lægstur í fyrsta leik sínum undir stjórn Ásgeirs Arnar. Þeir taka á móti Íslandsmeisturunum Vals á Ásvöllum á mánudagskvöld.
