Hinn 19 ára gamli leikstjórnandi Michal Olejniczak kvaddi SMS Gdansk í sumar og gekk til liðs við meistarana í Kielce þar sem hann mun veita Hauki Þrastarsyni samkeppni en Olejniczak þykir einstaklega efnilegur handknattleiksmaður eins og Haukur og var í pólska landsliðinu á EM í ársbyrjun.
Søren Haagen, hinn 46 ára gamli danski markvörður, lætur ekki deigan síga. Hann framlengdi í sumar samning sinn við GOG og verður þar með áfram samherji landsliðsmarkvarðar okkar Íslendinga, Viktors Gísla Hallgrímssonar, sem er meira en helmingi yngri en Haagen.
Uroš Šerbec, hinn þekkti fyrrverandi landsliðsmaður Slóvena, tók í sumar við þjálfun austurríska liðsins SC Ferlach.
Einn fremsti handknattleiksmaður Egypta í gegnum tíðina, Hussein Zaki, var ráðinn þjálfari Zamalek SC í heimalandi sínu á sumarmánuðum. Tarek Mahrous var ráðinn þjálfari AlAhly í Egyptalandi í stað Svíans Ola Lindgren.
Spánverjinn Cristian Ugalde yfirgaf Hannover-Burgdorf og skrifaði undir eins árs samning við AEK í Aþenu.
