- Auglýsing -
- Auglýsing -
- Auglýsing -
- Auglýsing -

Hef gert það besta úr mínum tækifærum á HM

Kristján Örn Kristjánsson, Donni, í leik við Svía á HM í janúar. Mynd/Hafliði Breiðfjörð
- Auglýsing -

„Mér finnst ég hafa gert það besta úr því sem ég hef fengið á þessu móti. Eins og staðan er núna þá erum við með frábærar hægri skyttur. Það að einhverjir séu á undan mér í röðinni er enginn harmleikur,“ sagði Kristján Örn Kristjánsson, Donni, sem hefur að ýmsra mati ekki fengið að láta ljós sitt skína nægjanlega mikið á heimsmeistaramótinu fram til þessa.


Donni kom við sögu í skamman tíma í leiknum við Grænhöfðaeyjar á miðvikudaginn og fékk aðeins lengri tíma í gær gegn Svíum. Hann skoraði fimm mörk í gær og reyndist sænska landsliðinu erfiður.

Vill auðvitað leika meira

„Auðvitað vill maður spila sem mest en fyrst og fremst eru það forréttindi að fá tækifæri til þess að leika fyrir hönd íslensku þjóðarinnar. Það fer líka eftir því hvernig þjálfarinn vill stilla upp liðinu fyrir hvern leik og hvaða áætlun hann leggur upp með hverjir leika mikið og hverjir minna. Þjálfarinn tekur sínar ákvarðanir og við sem tókum þátt í leiknum hverju sinni reynum eftir bestu getu að fylgja því eftir,“ sagði Donni sem var ánægður með eigin frammistöðu í leiknum við Svía í gærkvöld.

Var alls ekkert fyrir

„Ég er sáttur við það sem ég gerði í leiknum. Gott flæði var í sóknarleiknum meðan ég var með. Það var gaman að finna að maður var að gera eitthvað rétt. Ég var alls ekkert fyrir. Það er gott,“ sagði Donni sposkur á svip.

Vonbrigði ef við förum ekki lengra

Spurður um niðurstöðuna eftir heimsmeistaramótið komi til þess að íslenska landsliðið fellur úr leik á mótinu eftir keppni í milliriðli tvö verður lokið annað kvöld segir Donni ljóst vera að um vonbrigði verði að ræða.

„Síðasta korterið í leiknum við Ungverja svíður mest þegar við horfum um öxl. Það verður vonbrigði ef við komumst ekki lengra en um leið minni ég á að enn er möguleiki fyrir hendi gangi allt upp á morgun. Við gefumst ekki upp meðan einhver von er fyrir hendi,“ sagði Kristján Örn Kristjánsson, Donni, í samtali við handbolta.is.

HM 2023 – Milliriðlar, leikjadagskrá, staðan

- Auglýsing -
- Auglýsing -
- Auglýsing -
- Auglýsing -
- Auglýsing -
- Auglýsing -