Færeyski landsliðsmarkvörðurinn Annika Friðheim Petersen hefur kvatt Hauka í Hafnarfirði og skrifað undir samning við danska úrvalsdeildarliðið Nykøbing-Falster Håndboldklub – NFH. Frá þessu var greint á blaðamannafundi félagsins fyrir stundu. Petersen samdi við félagið fram á mitt ár 2024.
Nykøbing-Falster Håndboldklub er í sjötta sæti dönsku úrvalsdeildarinnar af 14 liðum með 19 stig eftir 18 leiki. Lið félagsins var danskur meistari 2017 og bikarmeistari ári síðar.
Einn markvarða liðsins er barnshafandi og tekur ekki þátt í fleiri leikjum á keppnistímabilinu. Forráðamenn félagsins þurftu þar með að hafa hraðar hendur til að ná í liðsauka.
Petersen kom til liðs við Hauka sumarið 2020 og hefur síðan verið einn allra besti markvörður Olísdeildarinnar. Hún var leyst undan samningi við Hauka rétt fyrir mánaðarmótin og hefur ekki tekið þátt í tveimur síðustu leikjum liðsins, gegn Aftureldingu og HK.
Þorgeir Haraldsson, formaður handknattleiksdeildar Hauka, sagði við handbolta.is það vera reglu hjá Haukum að standa standa ekki vegi fyrir leikmönnum liðsins sem fá tilboð frá sterkum félagsliðum í Evrópu, hvort sem það er í karla- eða kvennaflokki.
Margrét Einarsdóttir, sem kom til Hauka í sumar frá Val, tekur við stöðu aðalmarkvarðar af Petersen. Þá hafa Haukar fengið til liðs við sig Heiðbjörtu Önnu Guðmundsdóttur frá ÍR. Einnig er ungur markvörður, Sif Hallgrímsdóttir, við öllu búin.
