Allir leikmenn þýska 1. deildarliðsins Leipzig eru ýmist komnir í sóttkví eða eingangrun eftir því sem félagið greindi frá í gærkvöldi. Um miðja vikuna reyndist þjálfari liðsins, Andre Haber vera smitaður og fór þar af leiðandi ekki með liðinu til Stuttgart á fimmtudaginn. Á föstudag fóru allir leikmenn liðsins í skimun. Niðurstöður hennar sýndu fram á að nokkrir leikmenn eru smitaðir. Þeir eru komnir í einangrun en hinir ósmituðu eru í sóttkví fram að næstu skimun.
Þar af leiðandi fer enginn leikmaður liðsins til landsliðsverkefna á næstu dögum en leikmenn liðsins áttu m.a. að mæta til liðs við landslið Þýskalands, Sviss, Króatíu, Póllands og Noregs.
Enginn íslenskur handknattleiksmaður er samningsbundinn Leipzig.
Í yfirlýsingu Leipzig í gær segir að allt frá upphafi keppnistímabilsins hafi félagið gætt að sóttvörnum af samviskusemi. M.a. hafi allir leikmenn liðsins, þjálfarar og starfsmenn farið í skimun þrisvar sinnum í viku.
Ósennilegt er talið að næsti leikur Leipzig, gegn Essen 12. nóvember, fari fram á réttum tíma.
