Bjarki Már Elísson landsliðsmaður í handknattleik og markakóngur þýsku 1. deildarinnar á síðustu leiktíð hefur framlengt samning sinn við Lemgo til eins árs, fram til loka júní 2022.
Þetta kemur fram í tilkynningu frá félaginu í dag. Bjarki Már er nú á öðru keppnistímabili sínu með Lemgo en hann kom til félagsins sumarið 2019 eftir fjögurra ára veru hjá Füchse Berlin. Alls hefur Bjarki leikið í Þýskalandi í átta ár því áður en hann gekk til liðs við Füchse Berlin var hann í tvö ár hjá Eisenach.
Eins og áður segir þá var hann markakóngur þýsku 1. deildarinnar á síðustu leiktíð. Hann er nú í þriðja sæti yfir markahæstu menn deildarinnar með 107 mörk í 16 leikjum, er 16 mörkum á eftir Viggó Kristjánssyni, Stuttgart, sem leikið hefur tveimur leikjum fleira. Bjarki Már var markahæsti leikmaður Íslands á HM í Egyptalandi með 39 mörk í sex leikjum.
