- Auglýsing -
Aron Dagur Pálsson hefur skrifað undir nýjan tveggja ára samning við Olísdeildarliði HK. Aron Dagur kom til Kópavogsliðsins í haust sem leið og átti sinn þátt í að HK komst í úrslitakeppni deildarinnar í fyrsta sinn í 13 ár.
Aron Dagur er þrautreyndur 27 ára gamall handknattleiksmaður sem m.a. hefur leikið með Gróttu, Stjörnunni og Val hér heima, Alingsås og Guif í Svíþjóð og Elverum í Noregi. Með Val varð Aron Dagur Íslands- og bikarmeistari og Evrópubikarmeistari á síðustu leiktíð.
„Það er gríðarlega ánægjulegt og mikilvægt að halda Aroni Degi næstu ár og ég vænti mikils af okkar samstarfi og liðsins alls,“ er haft eftir Halldóri Jóhanni Sigfússyni þjálfara HK í tilkynningu.
- Auglýsing -
